საუბნო კომისიის წევრები „გაძევების“ მეთოდებზე გადავიდნენ

ქუთაისის №39 საარჩევნო უბნიდან საარჩევნო ბლოკის „ალიანსი საქართველოსთვის“ სამი წარმომადგენელი იქნა გეძევებული. კომისიის მიერ შედგენილ აქტში ნათქვამია, რომ ლევან აბზიანიძის, იპოლიტე ამბროლაძისა და ელიდა გოდუაძის მხრიდან ადგილი ჰქონდა კომისიის მუშაობისთვის ხელის შეშლისა და წესრიგის დარღვევის ფაქტს, ასევე, კომისიის თავმჯდომარისა და ამომრჩევლისადმი შეურაცხყოფის მიყენებას.

კომისიის წევრების განმარტებით, „ალიანსის“ წარმომადგენლებმა უბანზე მისულ ერთ-ერთ ამომრჩეველს - ანდრო მაღლაკელიძეს პირადობის დამადასტურებელი მოწმობა მოსთხოვეს, რისი უფლებაც მათ არ ჰქონდა. ამის გამო უბანში სიტუაცია დაიძაბა, რასაც კომისიის წევრების თქმით, მოჰყვა სიტყვიერი შეურაცხყოფა ალასანიას გუნდის წარმომადგენლების მხრიდან.
 

კომისიის მიერ შედგენილ აქტში მოყვანილ ფაქტებს საკუთარი ხელმოწერით აფიქსირებენ არასამთავრობო ორგანიზაციების - „დემოკრატიისა და თავისუფლების ცენტრის“ და „ახალი თაობა, ახალი ინიციატივის“ დამკვირვებლები.

„ალიანსის“ წარმომადგენლების თქმით, მათ უბანში მაღლაკელიძის შესვლამდე დააფიქსირეს ხუთი ამომრჩეველი, რომლებიც არ იმყოფებოდნენ სიაში, მაგრამ მაინც ცდილობდნენ ხმის მიცემას.

„ჩვენ ვნახეთ, რომ ერთ-ერთ მათგანს პირადობაში ეწერა, რომ რეგისტრირებული იყო ტყიბულში, მეორე - ავტოქარხნის დასახლებაში, ბუკიას ქუჩაზე და მათ მხოლოდ მას შემდეგ არ მიაცემინეს ხმა, რაც ჩვენ მივუთითეთ ამის თაობაზე კომისიის წევრებს. არავისთვის არ მიგვიყენებია შეურაცყოფა, ეს არის დისკრიმინაცია,“ - აცხადებენ უბნიდან გაძევებულები.

აღნიშნულ ფაქტებთან დაკავშირებით №39 საარჩევნო უბანში „ალიანსის“ წარმომადგენლებმა თავიანთი საჩივარი შეიტანეს.

ქუთაისის №21 საარჩევნო უბანი კი ცოტა ხნის წინ „სამართლიანი არჩევნების“ დამკვირვებელმა დატოვა პროტესტის ნიშნად. აღნიშნულ უბანზე საარჩევნო პროცესს „ახალი გაზეთის“ ჟურნალისტი თეკლა მორგოშია აკვირდება. მორგოშიას თქმით, „სამართლიანი არჩევნების“ დამკვირვებელმა უბანი მას შემდეგ დატოვამ რაც მას კომისიის მდივანმა „პადჟიგატელი“ უწოდა. კომისიის მდივნის თქმით, „ალიანსის“ წარმომადგენელმა საჩივარი სწორედ აღნიშნული დამკვირვებლის დახმარებით დაწერა.

„ახალი გაზეთი“