წინასაარჩევნო გარემო საარჩევნო სუბიექტების თვალით

ქუთაისის 2010 წლის მოწვევის საკრებულოში 15 პროპორციული მანდატის მოსაპოვებლად 9 პოლიტიკური გაერთიანება იბრძვის. როგორ და რა პირობებში აწარმოებენ აღნიშნული საარჩევნო სუბიექტები წინასაარჩევნო კამპანიას? რას პირდებიან ისინი ამომრჩეველს და რამდენად რეალურია ეს დაპირებები? იყენებს თუ არა მმართველი პარტია ადმინისტრაციულ რესურსებს და რა რესურსებით აწარმოებს ოპოზიცია საარჩევნო კამპანიას? ამ საკითხებთან დაკავშირებით გასულ კვირას "ახალი გაზეთის" რედაქციაში სადისკუსიო კლუბი გაიმართა. სადისკუსიო კლუბში მონაწილეობის მისაღებად ჩვენ რედაქციაში ცხრავე პოლიტიკური გაერთიანების საარჩევნო სიის პირველი ნომერი მოვიწვიეთ, თუმცა შეხვედრაში მონაწილეობა ოთხმა მათგანმა (ვიქტორ დოლიძე - "თოფაძე-მრეწველები", შალვა შანიძე - პოლიტიკური მოძრაობა "თავისუფლება", თეიმურაზ ქორიძე - "ეროვნულ-დემოკრატიული პარტია" და თემურ გრიგოლაშვილი - "თორთლაძე - დემოკრატიული პარტია") სხვადასხვა მიზეზის გამო ვერ მოახერხა. საბოლოოდ, "ახალი გაზეთის" სადისკუსიო კლუბში მონაწილეობდნენ: მამუკა მღვდელაძე - "ალიანსი საქართველოსთვის" საარჩევნო სიის პირველი ნომერი, გიორგი თევდორაძე - პ/გ "ერთიანი ნაციონალური მოძრაობის" საარჩევნო სიის პირველი ნომერი, შოთა ბურჯანაძე - "ეროვნული საბჭოს" საარჩევნო სიის პირველი ნომერი, გიორგი შავგულიძე - "თარგამაძე, გრიგოლია - ქრისტიან-დემოკრატიული გაერთიანების" საარჩევნო სიის მეორე ნომერი და დავით მალანია - მოქალაქეთა პოლიტიკური გაერთიანება "სრულიად საქართველოს სახალხო ალიანსის" საარჩევნო სიის პირველი ნომერი.

"ახალი გაზეთი": მოდით, ჩვენი დისკუსია დავიწყოთ იმის გარკვევით, თუ რამდენად თანაბარ პირობებში გიწევთ წინაასარჩევნო კამპანიის წარმოება?

მამუკა მღვდელაძე: პირობები მართლაც არათანაბარია, მაგალითად დაგისახელებთ სახელმწიფო რესურსების გამოყენებას: ის სახელმწიფო პროგრამები, რომლებიც უნდა ჩატარებულიყო შარშან, მაგალითად გადახურვის პროგრამა, ჩააგდეს სპეციალურად და წელს ხდება ისე, რომ მიდის მაჟორიტარი დეპუტატი კორპუსში ამომრჩევლებთან შეხვედრაზე და ურიგებს მათ სახურავებს და ა.შ. გრძელი ჩამონათვალი შეიძლება გავაკეთო იმ სახელმწიფო რესურსებისა, რასაც "ნაციონალური მოძრაობა" იყენებს. ამას გარდა, არათანაბარია პირობები, როდესაც ამდენი დაქირავებული თანამშრომელი ჰყავთ. ცალკე თემაა, თუ საიდან უხდიან მათ ხელფასს. ჩვენ არ გვაქვს შესაძლებლობა, რომ დავიქირავოთ ამდენი ადამიანი და მე, პირადად დავდივარ კარდაკარ. ამას გარდა, შეიძლება ითქვას, რომ ადგილობრივი ტელემედია ხელმიუწვდომელია ჩვენთვის: ადგილობრივი ტელეკომპანია, თავისი ინიციატივით, აშუქებს ყოველდღიურად "ნაციონალური მოძრაობის" ათივე მაჟორიტარის საქმიანობას.

"ახალი გაზეთი": თქვენ მიაწოდეთ ადგილობრივ ტელევიზიას თქვენი მაჟორიტარი კანდიდატების ამომრჩევლებთან შეხვედრის გრაფიკი? ანუ მიიწვიეთ თქვენს შეხვედრებზე და არ აშუქებენ?

მამუკა მღვდელაძე: ჩვენ გვითხრეს, რომ პოლიტიკური აქტივობის გაშუქება ამ დროს არის ფასიანი. ფასიან მომსახურებაზე არ დავუბლოკივართ, მაგრამ სამწუხაროდ, თანხის გადახდის საშუალება ჩვენ არ გვაქვს.

გიორგი შავგულიძე: მმართველ პარტიასთან თანაბარ მდგომარეობაში ვერ ვიქნებით, ცხადია. ეს არის არა მხოლოდ ქუთაისის პრობლემა, არამედ მსოფლიო პრობლემა: როდესაც ხელისუფლებაში არის პოლიტიკური ორგანიზაცია, მას თავისთავად უჭირს იმ სკამის დათმობა, რომელიც 5 წლის განმავლობაში ჰქონდა, მაგრამ ოპოზიციის ინტერესი არის ის, რომ მის უკან დგას ხალხი, ანუ ჩვენს მხარეზე არის ის, რაც მათ ვერ გააკეთეს და ამდენად, მხარდაჭერა ჩვენს მხარეზე უნდა იყოს, მათ მხარეს კი არის სახელმწიფო რესურსები. მთავარია, აკრძალული მეთოდები არ გამოიყენონ. ამ შემთხვევაში მე დავეთანხმები ბატონ მამუკა მღვდელაძეს: როდესაც 5 წლის განმავლობაში არ კეთდება და რატომღაც ბოლო ერთი თვის განმავლობაში ახსენდებათ გზების დაგება... თუ ჩვენ შევაჩვევთ საზოგადოებას ასეთი პრინციპებით ცხოვრებას, რაც ახლა გვაქვს, მივიღებთ არა თვითმმართველობას, არამედ - მმართველობას. მე ნადმვილად მინდა ვიხილო იმაზე უკეთესი არჩევნები, ვიდრე იყო 5 ან 10 წლის წინ. დღეს ჩვენ არ ვართ თანაბარ პირობებში, თუმცა მედიის ხელმისაწვდომობის კუთხით პრობლემები არ გვაქვს.

შოთა ბურჯანაძე: მე მინდა ბოლომდე ჩავწვდე შეკითხვის არსს: რას ნიშნავს თანაბარ პირობებში ყოფნა, როდესაც დღეს ხელისუფლება თავიდან ბოლომდე უზურპაციას ახდენს, როდესაც საზოგადოების უდიდესი ნაწილი შიშის ქვეშაა?! დღეს თანაბარ პირობებზე არ შეიძლება საუბარი! დღეს ჩვენ შევიტანეთ სარჩელი ცესკოში იმის თაობაზე, რომ ავტოქარხნის ტერიტორიაზე 50 ლარს პირდებიან "ნაციონალური მოძრაობის" წარმომადგენლები ერთი ხმის სანაცვლოდ.

გიორგი თევდორაძე: ტყუილია!

შოთა ბურჯანაძე: ჩვენ შევიტანეთ სარჩელი და ტყუილია, თუ არა, ამას სასამართლო გაარკვევს. არსებობენ მოწმეები, რომლებსაც შეპირდნენ 50 ლარს. მინდა ცალსახად ავღნიშნო, რომ ქვეყანაში, სადაც აზრის გამოხატვა დანაშაულია, არ შეიძლება თანაბრობაზე ისაუბრო. რაც შეეხება მედიას: დაახლოებით 9 თვის წინ, ჩვენმა პარტიამ - "მოძრაობა სამართლიანი საქართველოსთვის" მიმართა ტელეკომპანია "რიონს" კლიპის გაშვების თაობაზე, რაზეც მივიღეთ უარი. კონტრაქტის ღირებულება შეადგენდა 21 ათას ლარს. თანაც, კლიპი იყო არა - წინასაარჩევნო, არა - ანტიკონსტიტუციური. მოსახლოებამ ხომ იცის, როგორი ზეწოლა ხორციელდება მათზე?!

გიორგი თევდორაძე: მართლა გაოცებული ვარ! შოთიკო ჩემი ბავშვობის მეგობარია, ასევე - მამუკაც. ბატონ გოგი შავგულიძეს დიდი ხანია ვიცნობ. ჩვენ ყოველგვარი პარტიული პარტიკულარიზმის გარეშე, გვაკავშირებს ერთი მნიშვნელოვანი დუღაბი, რასაც ჩვენი თანაქალაქელობა და ქუთაისელობა ჰქვია. ამიტომ მგონია, რომ გაცილებით უფრო გულწრფელი, გაცილებით უფრო გულახდილი უნდა იყოს ეს პოლემიკაც. მე მინდა კომენტარი გავაკეთო შოთიკოს მიმართ. თავისუფალი აზრის გამოთქმა არ არის დანაშაული, მაგრამ როდესაც აგვისტოს ომის შემდეგ პოლიტიკური ლიდერი ჩადის ჩემი და შენი ქვეყნის მტერთან, ხელს ართმევს და იქ რაღაც სამომავლო ურთიერთობებზე მიდის საუბარი... ბოდიშს ვიხდი, მაგრამ ჩემი სუბიექტური მოსაზრებაა, ეს, რბილად რომ ვთქვათ, ქვეყნის ღალატია. რაც შეეხება დასმულ შეკითხვას: მოგეხსენებათ, სულ 2 კვირაა, რაც გადავდექი ქუთაისის მერის თანამდებობიდან, თუმცა საქართველოს კანონმდებლობით, შემეძლო არც გადავმდგარიყავი და გავსულიყავი შვებულებაში, მაგრამ ჩემმა პარტიამ მიიჩნია, რომ ჯობდა ასეთი გადაწყვეტილება მიმეღო - უარი მეთქვა დაკავებულ თანამდებობაზე, რათა მე და თქვენ თანაბარ პირობებში ვყოფილიყავით,

რაც შეეხება თანაბარ პირობებს: თუკი ჩვენ მხედველობაში მივიღებთ იმას, რაც გაკეთდა 2010 წლის დადგომის შემდეგ: 80კმ გამოცვლილ წყალსადინარს, 19 მარტივი ტიპის მოედანს, 3500 სანათ წერტილს, 110 000 კვ.მ გოფრირებულ სახურავს, 84 000 კვ.მ ბრტყელ გადახურვას, ყველა იმ პროექტს, რომელიც მიმდინარეობს ქალაქში - ეს არის ცენტრალური მოედანი, დახურული ტიპის მოედანი, კორტები, ოპერის თეატრის რეაბილიტაცია, რა თქმა უნდა, ჩვენ არა ვართ პარიტეტულ პირობებში. იმიტომ, რომ ამომრჩეველთან მისვლის დროს არის გაკეთებული საქმეები, რაც უპირატეს მდგომარეობაში გვაყენებს. მინდა ვთქვა, რომ ქართველი ხალხი არის ძალიან ობიექტური და სწორედ მათი გონივრულობის წყალობით ჩვენი ქვეყანა ავად თუ კარგად მოვიდა დღემდე.

ჩვენი აქტივობა არის გაცილებით მეტი და პირადად მე დაახლოებით 6-7 არჩევნები მაქვს გამოვლილი და ასეთი პასიურობა ოპოზიციის მხრიდან, ჯერ არ მინახავს. მე ვფიქრობ, ეს ყველაფერი - ოპოზიციის ბრალდებები არის ძალიან უსუსური წინაპირობა, ატეხილი ცრუ განგაშის ზარი იმისათვის, რომ მათთვის არასასურველი შედეგის დადგომისას თქვან, რომ არჩევნები გაყალბდა.

შოთა ბურჯანაძე: აქ პოლიტიკაზე, ქვეყნის გადარჩენაზეა საუბარი და არ შემიძლია არ ვთქვა, რომ რუსეთში ჩასული ჩვენი ლიდერი საქართველოს ოკუპაციაზე კი არ საუბრობდა, არამედ - დეოკუპაციაზე, საქართველოს გაერთიანების შანსის შენარჩუნებაზეა საუბარი და არა იმაზე, რომ დავკარგეთ დღეს ჩვენ კოდორი და საქართველოს სხვა ტერიტორიები.

გიორგი თევდორაძე: ასეთი შანსი ჰქონდა ყორღანაშვილს. როგორც ქართველი, შენი თანაქალაქელი, გეუბნები კაცურად: ოთხზე უნდა ჩავიდეთ მტერთან?

შოთა ბურჯანაძე: ორზე ჩადით და ნორმალურად ჩადით, ან თუ არ გინდათ ჩასვლა, საერთოდ ნუ ჩახვალთ, მაგრამ მე ჩემი ქვეყნის ტერიტორიებს ნუ მართმევთ! ამაზეა აქ საუბარი. ეს იმ პროპაგანდის შედეგია, რასაც თქვენი ხელისუფლება ეწევა.

"ახალი გაზეთი": მოდით, ისევ ჩვენს მიერ დასმულ საკითხს დავუბრუნდეთ - რამდენად თანაბარ პირობებში აწარმოებთ საარჩევნო კამპანიას? და ბატონო დავით, თქვენი პასუხი არ მოგვისმენია ამ საკითხზე.

დავით მალანია: რა თქმა უნდა, არ ვართ თანაბარ პირობებში. რატომ არ ვართ თანაბარ პირობებში? - გიპასუხებთ: მე ვარ მაჟორიტარის დეპუტატობის კანდიდატი ძელქვიანში და იქ ჩემი კონკურენტი "ნაციონალური მოძრაობიდან" არის სერგო ლექვინაძე. მოვიდა სერგო უბანში ამომრჩევლებთან შესახვედრად და მოყვა ქალაქის კეთილმოწყობის სამსახური, ქალაქ-განათება, წყალკანალი, დიდი-დიდი ბლოკნოტებით, იწერდნენ, იწერდნენ და ხალხს დაპირდნენ, რომ წინასაარჩევნოდ ეს ყველაფერი გაკეთდება. საუბარია, ვთქვათ, გაჭედილი კანალიზაციის შეკეთებაზე, რაზეც ჩვენ, იმ უბნის მცხოვრებლები ბოლო 15 წელია ვითხოვთ დახმარებას. არხი ჩადის ჩვენთან და სპეციალური მანქანაა საჭირო, რომ გაიწმინდოს. შეპირდნენ, რომ გააკეთებენ. მე ჩემს ამომრჩეველს იგივეს ვერ გავუკეთებ. არავინ საუბრობს იმ თანხაზე, რაც შეუძლიათ ბიზნესმენებმა გაიღონ თავიანთი კეთილი ნებით ამათუიმ პარტიის ფონდში შემოწირულობის სახით. ვერავინ დღეს, ვერც მე (მე მაქვს ჩემი პატარა ბიზნესი), ვერ გავბედავ და არ გავაკეთებ, რომ რომელიმე ოპოზიციური პარტია დავაფინანსო.

გიორგი თევდორაძე: ვინ შეზღუდა ეს ხალხი?

დავით მალანია: რა თქმა უნდა, პირდაპირი წესით ამას არავინ კრძალავს, მაგრამ ფინანსური პოლიცია და საგადასახადო ინსპექცია აუცილებლად შემოვა შესამოწმებლად, თუკი ოპოზიციას დააფინანსებ.

მამუკა მღვდელაძე: პირადად ჩემი ბიზნესის მიმართ ყველა სახის საგადასახადო შემოწმება იქნა გამოყენებული, ერთი კვირა დამილუქეს ბიზნესი და 295 ლარით დაჯარიმდა ჩემი ორგანიზაცია. ამ წუთას 120 ლარის ქსეროასლები მაქვს მიტანილი საგადასახადოში და კიდევ ერთხელ ამოწმებენ. ამის გამო, ჩემს პარტნიორებს, რომელთაც არანაირი შეხება არა აქვთ პოლიტიკასთან, გამოხედვა აღარ უნდათ აქეთ და თუ დაიხურება ჩემი ბიზნესი, პირდაპირ დავადანაშაულებ იმ საგადასახადო ორგანოების თანამშრომლებს, რომლებიც უფლებების გადამეტებით ახდენენ ზეწოლას ჩვენზე.

ამ ხელისუფლებამ ეკონომიკური კრიზისის დროს გადაუარა ბიზნესს, ყველა ბიზნესს და არა მარტო ჩემს ბიზნესს, არანორმალური ჯარიმები დააწესეს და მერე დაიწყებენ საუბარს დასაქმებაზე. მაქვს კონკრეტული მაგალითები, როდესაც დაუწესეს ისეთი ჯარიმები, რომელიც უდრის მათი ორგანიზაციის დახურვას. საგადასახადო ადმინისტრირების გაძლიერება დღეს, ფინანსური კრიზისის დროს, არის ყოვლად მიზანშეუწონელი, მაგრამ ამით აღწევენე ბიზნესმენების მორჩილებას. ამის მიზანი იყო ერთი ის, რომ შეევსოთ თავიანთი ბიუჯეტი - "ნაციონალური მოძრაობის" ყულაბა და მეორე - გაეხადათ მორჩილად ყველა ბიზნესი.

შოთა ბურჯანაძე: როდესაც შიშზე და ბიზნესის ტერორზეა საუბარი, არა მარტო ქუთაისში, არამედ საქართველოს მასშტაბით, ძალიან ბევრია ამის ნათელი მაგალითი. ვერც ერთი ოპოზიციური პარტია ვერ იღებს შემოწირულობას ბიზნესისგან.

დავით მალანია: იმაზე კი არ არის საუბარი, რომ დღეს ვიღაცა ფულს ჩარიცხავს და ხვალ ხელებს გადაუგრეხენ. შეიძლება არც არავინ დაიჭირონ და არც რაიმე ზეწოლა მოხდეს, მაგრამ იმდენად არიან შეშინებულები, რომ ვერ გარისკავენ. ეს ხომ ფაქტია!...

გიორგი თევდორაძე: 2003 წელს, როდესაც ჩვენ მოვახდინეთ რევოლუცია და არსებული რეჟიმის შეცვლა, გვყავდნენ ადამიანები, რომლებიც გვერდში გვიდგნენ და თქვენ კარგად იცით, რომ ქვეყანაში რეჟიმის შეცვლა ფინანსების გარეშე შეუძლებელია. იმ ადამიანებს ჰქონდათ იმდენად დიდი მუხტი სოლიდარობისა, რომ მხარს გვიჭერდნენ ღიად და აშკარად.

"ახალი გაზეთი": იქნებ ეს ფაქტი იმაზე მეტყველებს, რომ მაშინ თავისუფლებისა და დემოკრატიის უფრო მაღალი ხარისხი იყო?

გიორგი თევდორაძე: თქვენ ახლა თვითონვე აკეთებეთ თქვენი სისუსტის დეკლარირებას, როცა ამბობთ, რომ ბიზნესი არ გიჭერთ მხარს.

მამუკა მღვდელაძე: ასივე პროცენტს არ მოვწონვართ? მითხარით ერთი მაგალითი მსოფლიოში, რომელიმე ქვეყნის, სადაც არც ერთ ოპოზიციურ პარტიას არ უჭერს მხარს ბიზნესი.

გიორგი თევდორაძე: მე მოვითხოვ უფრო მეტ კონკრეტიკას, რომელი ბიზნესი იქნა დატერორებული ოპოზიციის მხარდაჭერისთვის? მამუკა, შენ უსამართლოდ დაგეწერა ის 295 ლარიანი ჯარიმა?

მამუკა მღვდელაძე: არ ვამბობ, რომ უსამართლოდ დამეწერა, მაგრამ ერთი კვირა ეძებდნენ და მექანიკური შეცდომა აღმომიჩინეს.

"ახალი გაზეთი": ბატონო გიორგი, თქვენ ითხოვთ კონკრეტიკას და მინდა გამოგეხმაუროთ რამდენიმე ფაქტით. თქვენი წლევანდელი საარჩევნო ფონდის შესახებ ინფორმაცია გამოქვეყნდება მოგვიანებით და შემდეგ გავიგებთ დეტალურად, თუ რომელი ბიზნეს-კომპანიები აფინანსებენ თქვენს საარჩევნო კამპანიას, მაგრამ ჩვენ გავეცანით წინა, 2008 წლის არჩევნების დროს თქვენი პარტიის შემომწირველების ნუსხას და იქ ძალიან საინტერესო სურათი აღმოვაჩინეთ: მაგალითად, შპს "დაგმა" წინა არჩევნების დროს "ნაციონალურ მოძრაობას" 60 ათასი ლარი შეწირა, სწორედ ეს ფირმა შეირჩა წელს ერთ პირთან მოლაპარაკების გზით ქუთაისში "ტორპედოს" სტადიონის სარეკონსტრუქციო სამუშაოების შესასრულებლად, რისთვისაც მიიღო 2 მილიონი ლარი. ასევე, ეს ფირმა ახორციელებს ოპერის თეატრის სარეაბილიტაციო სამუშაოებს ქუთაისში. არსებობს სხვა ფირმების მაგალითებიც, რომლებმა მიიღეს სახელმწიფო დაფინანსება ქუთაისში ერთ პირთან მოლაპარაკების გზით. ეს ის ფირმებია, რომლებმაც წინა არჩევნების დროს თქვენი პარტიის საარჩევნო ფონდში შეწირეს სოლიდური თანხები.

გიორგი თევდორაძე: ერთი წუთით, აქვე განვმარტავ, რომ ოპერის თეატრის სარეაბილიტაციო სამუშაოებისთვის ჩატარდა ტენდერი: 3 მილიონ 675 ათას ლარად იყო შეფასებული ეს სამუშაოები და შპს "დაგმა" წარმოადგინა წინადადება, რომ 1 700 218 ლარად შეასრულებდა სამუშაოებს. შესაბამისად, მოიგო ეს ტენდერი.

"ახალი გაზეთი": და თქვენ დარწმუნებული ხართ, რომ მის მიერ ნახევრის ფასად შესრულებული სამუშაოები იქნება ხარისხიანი?

გიორგი თევდორაძე: მოვლენებს ნუ გავუსწრებთ!

"ახალი გაზეთი": კი, ბატონო, მაშინ მეორე მაგალითს გეტყვით: სამშენებლო კომპანია "თბილისი 2005"-მა შეასრულა ქუთაისში ორი წლის წინ თეთრი ხიდის სარეკონსტრუქციო სამუშაოები, რომელიც სხვათაშორის, რამდენიმე დღის წინ ჩაინგრა. ამ კომპანიასაც აქვს გადარიცხული სოლიდური თანხა "ნაციონალური მოძრაობის" საარჩევნო ფონდში. ანუ პრაქტიკულად, ქუთაისში რომელმა კომპანიამაც მიიღო საბიუჯეტო დაფინანსება, ყველანი იყვნენ წინა არჩევნების დროს "ერთიანი ნაციონალური მოძრაობის" შემომწირველები. თქვენც იგივე ტრადიციის გაგრძელებას აპირებს ხელისუფლებაში ისევ მოსვლის შემთხვევაში?

გიორგი თევდორაძე: მე ახლა ჩვეულებრივი მოქალაქე ვარ, მაგრამ იმ კავშირებიდან და ურთიერთობებიდან გამომდინარე, რაც მაქვს შენობასთან, სადაც 4-5 თვის განმავლობაში ვიყავი ქალაქის მერი, შემიძლია ძალიან სწრაფად მოვაგვარო და ნუსხა შემოგთავაზოთ იმ კომპანიებისა, რომლებმაც ტენდერები მოიგეს ქუთაისში და გადავამოწმოთ ეგ ამბავი.

"ახალი გაზეთი": ჩვენ ვრცლად ვისაუბრეთ იმაზე, თუ რამდენად თანაბრ პირობებში უწევს მმართველ პარტიასა და ოპოზიციას საარჩევნო კამპანიის წარმოება ქუთაისში და შევეხეთ ადმინისტრაციული რესურსების თემას. იქნებ, უფრო ვრცლად და კონკრეტული ფაქტებით ვისაუბროთ ამ საკითხის გარშემო.

მამუკა მღვდელაძე: როდესაც ვიძახი, რომ ადმინისტრაციული რესურსისთვის იხარჯება ძალიან ბევრი თანხა, ამის ნათელი მაგალითია ეს ფაქტი: ჩემი ინფორმაციით, მერიაში მუშაობს 510 ადამიანი, აქედან, ამ წუთას შვებულებაშია უმრავლესობა და დაახლოებით 200 ადამიანია დარჩენილი. მე ვფიქრობ, რომ ის 200 ადამიანიც შეიძლება ზედმეტია. დღეს 300-მდე ადამიანი არის შვებულებაში და ყველა გადანაწილებულია "ნაციონალური მოძრაობის" შტაბებში. ეს არის, ერთის მხრივ, მავნე გამოყენება რესურსის, ხოლო მეორეს მხრივ, არის მავნე წარმონაქმნი - როდესაც 510 ადამიანს ქირაობ და წელიწადში 6,5 მილიონს ხარჯავ მათი ხელფასებისთვის.

გიორგი შავგულიძე: მუნიციპალიტეტების ხელმძღვანელები დღეს არიან "ნაციონალური მოძრაობის" შტაბის ხელმძღვანელები, ხოლო მუნიციპალიტეტების შენობები არის ამ შტაბების ოფისები.

"ახალი გაზეთი": და არა აპირებთ ამის თაობაზე შესაბამისი საჩივრების მომზადებას?

გიორგი შავგულიძე: ჩემზე უკეთესად არავინ არ იცის, როგორი სასამართლოა დღეს საქართველოში.

გიორგი თევდორაძე: თქვენ შეურაცხყოფთ ჩვენი ქვეყნის სასამართლოს!

გიორგი შავგულიძე: ისინი თავად შეურაცხყოფენ საკუთარ თავს. ჩემს თავზე გამოვცადე: როდესაც უზენაესმა სასამართლომ გამოიტანა გადაწყვეტილება, მივმართე საკრებულოს, რომ დაეკმაყოფილებინა და არ შესრულდა.

"ახალი გაზეთი": ბატონო გიორგი, ადმინისტრაციული რესურსების გამოყენებასთან დაკავშირებით ერთი ასეთი ფაქტის თაობაზე მინდა გკითხოთ: ორიოდე დღის წინ "საქართველოს ადვოკატთა ასოციაციამ" გამართა შეხვედრა ქუთაისელ ადვოკატებთან, თუმცა, ფაქტობრივად, ეს შეხვედრა უფრო მეტად "ქრისტიან-დემოკრატიული მოძრაობის" საარჩევნო კამპანიის ნაწილად იქცა: თქვენმა ერთ-ერთმა ლიდერმა ნიკა ლალიაშვილმა, რომელმაც აღნიშნული შეხვდერა იუსტიციის საბჭოს წარმომადგენლის სახელით გახსნა, თავდპირველად აღნიშნა, რომ ეს არ უკავშირდებოდა არჩევნებს, მაგრამ რეალურად, ეს უკავშირდებოდა არჩევნებს. ეს არ არის თქვენი მხრიდან ადმინისტრაციული რესურსის გამოყენება?

გიორგი შავგულიძე: ნიკა ლალიაშვილი იუსტიციის საბჭოს სახელით ჩამოვიდა. მას სრული უფლება ჰქონდა ადვოკატებს შეხვედროდა. მე, როგორც პარტიის ხელმძღვანელი, ვალდებული ვიყავი, ამ შეხვედრის ორგანიზება გამეკეთებინა. შეხვედრა შედგა "მწერალთა სახლის" დარბაზში და დარბაზის იჯარის თანხა მე გადავიხადე, მაგრამ თანხა მივიღე ნიკა ლალიაშვილიდან. ეს რომ საარჩევნო კამპანიის ნაწილი ყოფილიყო, მე იქ უნდა ვყოფილიყავი, მაგრამ მე სწორედ იმ მომენტში, როდესაც ეს შეხვედრა მიმდინარეობდა, სხვაგან ვიყავი შეხვედრაზე.

"ახალი გაზეთი": მაგრამ თქვენი სიის პირველი ნომერი და სხვა წარმომადგენლების იყვნენ იქ.

გიორგი შავგულიძე: სიის პირველი ნომერი იურისტია და ამიტომაც იყო იქ.

"ახალი გაზეთი": გასაგებია, მოდით სხვა პარტიების წარმომადგენლებმაც დაასახელონ კონკრეტული ფაქტები ადმინისტრაციული რესურსების გამოყენებისა, თუკი გაქვთ ასეთი ფაქტები.

შოთა ბურჯანაძე: გავიხსენოთ, თუნდაც ორმაისობის ღონისძიებები. იმ ფასად, რაც იმ ვერტმფრენის დაქირავებას დასჭირდა და იმ ლექსების გადმოყრას მოხმარდა, რომელიც ტალახში ამოისვარა, იმით შეიძლებოდა 2 ოპერაციის გაკეთება და ვიღაცისთვის სიცოცხლის შენარჩუნება. მე ვერ დავიჯერებ, რამ ამ ღონისძიებების დაგეგმვაში გიორგი თევდორაძე არ მონაწილეობდა და ეს არის სწორედ ადმინისტრაციული რესურსის გამოყენება.

"ახალი გაზეთი": რახან ამ საკითხს შევეხეთ, მეც დავამატებ კონკრეტულ მაგალითებს, რომ ერთიანად გვიპასუხოს ამაზე ბატონმა გიორგიმ. ბატონო გიორგი, თქვენ 2 მაისს გამოჩნდით პრემიერ-მინისტრის გარემოცვაში, როდესაც მან გახსნა რკინიგზის სადგური და სხვა ობიექტები, ხოლო 4 მაისს იგივე ობიექტების გახსნისას აღმოგაჩინეთ პრეზიდენტის გარემოცვაში. ამასთანავე, საინტერესო იყო ის ფაქტი, რომ ნაციონალურმა ტელეარხებმა ორმაისობის დღესასწაულთან დაკავშირებით გადასცეს თქვენი ინტერვიუები, სადაც სტატუსად მიწერილი გქონდათ ქუთაისის ყოფილი მერი და არა "ნაციონალური მოძრაობის" საარჩევნო კანდიდატი. არის თუ არა ეს ყველაფერი თქვენი მხრიდან ადმინისტრაციული რესურსების გამოყენების მაგალითი?

გიორგი თევდორაძე: ვიყავი ქუთაისის ყოფილი მერი და ფაქტის კონსტატაცია მოახდინეს ტელევიზიებმა. უჩივლეთ მაშინ თქვენს კოლეგებს, თუ ტყუილი გადასცეს. რაც შეეხება ორმაისობის დღესასწაულს, 27 აპრილამდე ვიყავი ქალაქის მერი და ბუნებრივია, ეს მოვლენები ვერ ამივლიდა გვერდს. რატომ ვიყავი იქ? გეტყვით, რომ ქუთაისელი ვარ და მიხაროდა, რომ ჩემი ქალაქის ზეიმზე ვიყავი. რატომ ვნახე ნიკა გილაური? იმის გამო, რომ მასთან ვმეგობრობ უკვე წლებია, ჯერ კიდევ 2001-2002 წლებიდან. არ ვყოფილვარ რკინიგზის სადგურის გახსნის ცერემონიალზე, მართლა გეუბნები, დედას გეფიცები, მამას გეფიცები, ჩემს კოკას და ტატას გეფიცები. მაგრამ ექვთიმე თაყაიშვილის ძეგლის გახსნაზე, რომლის დადგმაშიც მქონდა მონაწილეობა მიღებული, ბუნებრივია, ვერ გაივლიდა ჩემი ინტერესის გარეშე და მივედი იმიტომ, რომ მაინტერესებდა, როგორც რიგით ქუთაისელს. ნიკა გილაურმა რომ ჩამომართვა ხელი, ამას არ კრძალავს ჩვენი ქვეყნის კონსტიტუცია.

ნუ გაგიკვირდებათ, რომ ქალაქის თვითმმართველობაში ბევრი ისეთი ადამიანი იყო და არის, რომელიც "ნაციონალურ მოძრაობასთან" ძალიან ახლო კავშირშია საარჩევნო კოდექსის სრული დაცვით. მაგალითად, ქეთი დეისაძე, ჩემი ყოფილი პრეს-მდივანი შვებულებაშია და ჩემთან ერთად აწარმოებს საარჩევნო კამპანიას. ამაში ცუდი არაფერია.

"ახალი გაზეთი": გადავიდეთ თქვენს საარჩევნო პროგრამებზე. ძალიან მოკლედ გაგვაცანით თქვენი მთავარი საარჩევნო მესიჯები.

დავით მალანია: ძალიან მნიშვნელოვანია ჩვენთვის, შევინარჩუნოთ საშუალო ფენა - მცირე და საშუალო ბიზნესში დასაქმებული ადამიანები. ის ხალხი, ვინც წარმოადგენს ხერხემალს საზოგადოებისას, რომელიც დღეს არის ძალიან ცუდ დღეში.

მამუკა მღვდელაძე: ჩვენ პრიორიტეტები სამი მიმართულებით გამოვყავით. ესენია: ბიზნესის ხელშეწყობა, ჯანდაცვა და სოციალური უზრუნველყოფა, ინფრაქტრუქტურის განვითარება ქალაქში.

გიორგი შავგულიძე: 10 თეთრი - გაზი, 5 თეთრი - დენი და წყალი - უფასო. ეს არის დასაბუთებული თეორია. თუ ჩვენ გვსურს, რომ საქართველოში განვითარდეს ბიზნესი, აუცილებელია სატარიფიკაციო პოლიტიკის გატარება. მაგალითად შევარდნაძის დროს ყველაზე დაბალი ნიშნული, რაც დაფიქსირდა მიწის მოხვნის კუთხით იყო 650 ათასი ჰექტარი. გასულ წელს კი საქართველოში 300 ათასი ჰექტარი მოიხნა. სწორედ ხელოვნურად გაზრდილი ტარიფების გამოა ის, რომ საქართველო, რომელიც არის სასოფლო-სამეურნეო ქვეყანა, უკან-უკან მიდის.

შოთა ბურჯანაძე: მთავარი პრობლემა, რაც დღეს აწუხებს მოსახლეობას, არის დასაქმება და ეს იქნება ჩვენი პრიორიტეტი, მაგრამ მინდა ხაზი გავუსვა, რომ ჩვენი პრიორიტეტია დასაქმება საქართველოში და არა - საქართველოს ფარგლებს გარეთ. ჩვენ განვავითარებთ მცირე და საშუალო ბიზნესს: გავაუქმებთ ფინანსურ პოლიციას და მოგების გადასახადს შევამცირებთ 15%-მდე.

გიორგი თევდორაძე: რაც შეეხება წინასაარჩევნო დაპირებას, ეს არის ის საქმეები, რაც გვაქვს დაწყებული და ეს არის ახალი სამუშაო ადგილები, კიდევ ბევრი გასაკეთებელი საქმე. ის ადმინისტრაციული აქცენტები, რაც კეთდება ქუთაისთან მიმართებაში, რომ 2012 წელს ქუთაისი იქნება საპარლამენტო ქალაქი, პირდაპირ პროპორციულად ნიშნავს ბიზნესის დაინტერესებას, ახალ საინვესტიციო გარემოს და ახალ სამუშაო ადგილებს.

"ახალი გაზეთი": ძალიან საინტერესო იქნება ჩვენი მკითხველისთვის, რომ მოისმინოს თქვენი მხრიდან თქვენი ოპონენტების პროგრამების კრიტიკა: რომელი დაპირება მიგაჩნიათ რეალურად და რომელი - არა?

დავით მალანია: გადასარევადაა ჩამოყალიბებული ეს პროგრამები, მაგრამ აღსრულებაა საქმე. მე მაინც მგონია, რომ თუ არ შევაშინებთ ხალხს და ხელს არ შეგვიშლის სახელმწიფო, მივხედავთ ჩვენს თავს.

მამუკა მღვდელაძე: ჯერ ერთი, მინდა, რომ "ქრისტიან-დემოკრატებმა" დააკონკრეტონ, როგორ წარმოუდგენიათ ქუთაისის სინამდვილეში იმის შესრულება, რასაც პიდებიან ხალხს - ტარიფების შემცირებას. და მეორე, იმ ფონზე, როდესაც ბიზნესი ტერორდება, რა მიაჩნია "ნაციონალურ მოძრაობას" დასაქმებად? - ის, რომ "ნაცმოძრაობის" აქტივი ჰყავთ ახლა ჩართული საარჩევნო კამპანიაში?

გიორგი შავგულიძე: ჩვენი დაპირებები არის აბსოლუტურად რეალისტური. თუკი ჭანტურია გახდება თბილისის მერი, ის მიმართავს კონსორციუმს და ეს ტარიფი დადგინდება თბილისში, მერე კონსტიტუციის 31-ე მუხლი ამუშავდება, რომელიც გავრცელდება მთლიანად საქართველოზე.

შოთა ბურჯანაძე: მე მმართველ პარტიას მინდა მივმართო: იმ ქვეყანაში, სადაც 6 მაისი, გიორგობის დღე, ცხადდება პოლიციის დღედ; მემორიალს ქუთაისში აფეთქებენ და კლავენ 2 ადამიანს; სადაც 13 მარტის "ქრონიკა" ჟღერდება, მე არ შემიძლია ამ ხელისუფლების რომელიმე დაპირებას ვენდო.

"ახალი გაზეთი": ჩვენი საუბრის ბოლოს თითოეულ თქვენგან აქვს საშუალება ძალიან მოკლედ შეეხოს იმ საკითხებს, რაზეც შესაძლოა არ გვისაუბრია, მაგრამ თქვენ მიგაჩნიათ, რომ მნიშვნელოვანია მათზე ყურადღების გამახვილება.

დავით მალანია: რა თქმა უნდა, არის უზარმაზარი საქმე გაკეთებული, ბევრ რამეში მხარს ვუჭერთ, მაგრამ რომ ვთქვათ ისე, რომ ყველაფერი კარგადაა, არავის არაფრის არ ეშინია და ყველაფერი აწყობილია, ეს ხმამაღალი ნათქვამი იქნება. ახალ ხელისუფლებაში ვინც მოვა, უნდა გამოიყენოს შანსი იმისათვის, რომ მაქსიმალურად გავაძლიეროთ ადგილობრივი ხელისუფლება. არ შეიძლება ყველაფერი თბილისიდან იმართებოდეს, რაც ბოლო წლებში ძალიან შესამჩნევია და მივცეთ ხალხს ამოსუნთქვის საშუალება. მე ნამდვილად არ მინდა ყოველ მეორე მაღაზიას ეწეროს - ქირავდება ან იყიდება, მე არ მინდა აშენდეს სავაჭრო ცენტრები და არ შეივსოს, რადგან იქ შემსვლელი არ მოიძებნება იმიტომ, რომ ბიზნესი არ წარმოებს. მე მგონია, რომ დღეს საქართველოში ეკონომიკა კვდება.

მამუკა მღვდელაძე: დღეს მოსახლეობა ჩვენგან ელის სწორედ იმ პრობლემების მოგვარებას, რომელიც არსებობს და არა მხოლოდ შეცდომებზე საუბარი, თუმცა ასეთი შეცდომები ძალიან ბევრია: როდესაც საუბრობდა ბატონი გიორგი ინვესტორების შემოსვლაზე, სამწუხარო ფაქტია ის, რომ რეაბილიტირებულ ისტორიულ ზონაში არც ერთი ინვესტორი არ შემოსულა ამ ორი წლის განმავლობაში. დღეს მთავარი პრობლემა არის დასაქმება, რაც ასახულია ჩვენს პროგრამაში და ასევე, ჯანდცვა და სოციალური პროგრამები, რომლებიც ძალიან ხელმიუწვდომელია მოსახლეობისთვის.

გიორგი შავგულიძე: საკრებულოს უმთავრესი ფუნქციაა შუამავლობა მმართველობასა და ხალხს შორის. ქუთაისის საკრებულოს ძალიან დიდი ხნის ისტორია აქვს და მე ძალიან დამწყდებოდა გული, თუ საკრებულოს მუშაობის სტილი უფრო თუ არ განვითარდებოდა. საკრებულო არ უნდა გახდეს თვითმმართველობის დანამატი. აქედან გამომდინარე, აუცილებლად მიმაჩნია მოქალაქეებისა და საზოგადოებრივი ორგანიზაციების ჩართულობა საკრებულოს საქმიანობაში. ამ კუთხით დასავლეთს აქვს სერიოზული გამოცდილება, სადაც საკრებულოებთან ერთად ფუქნციონირებს ე.წ. "მომავლის სახელოსნოები". მეორე საკითხი: ჩვენ ვერანაირად ვერ განვავითარებთ ბიზნესს, თუ არ მოწესრიგდება სატარიფიკაციო და საგადასახადო პოლიტიკა.

შოთა ბურჯანაძე: შევპირდები ქუთაისის მოსახლეობას სოციალური პრობლემების მოგვარებას და დასაქმებასთან დაკავშირებით მინდა ნათლად აღვნიშნო ვერც ერთი საწარმო - ათი, თუნდაც ოცი ხელოვნურად შექმნილი ქარხანა, ვერანაირ პირობას ვერ შექმნის ქვეყნის ბედნიერებისთვის, თუ მას გასაღების რეალური ბაზარი არ მოჰყვა. ჩვენ ვეძებთ ევროპის გზებს, სადაც მე 8 წელი ვცხოვრობდი და საქართველომ ჯერ ვერ მოიკიდა იქ ფეხი, ამიტომ ჩვენ დავუბრუნებთ რუსეთის ბაზარს, სადაც ადვილია, როგორც გატანა, ასევე - გაყიდვა. დღევანდელ ხელისუფლებას თვითონაც აქვს ამის სურვილი, მაგრამ ვერ აცხადებს ხმამაღლა. ჩვენ გადავდგამთ ზუსტად იმ ნაბიჯებს, რომელიც დაუბრუნებს ქართველ ხალხს - გლეხს, მეწარმეს, ამ ბაზარს, რომელიც ხელს შეუწყობს ხვავის და ბედნიერების მოტანას. ეს იქნება ჩვენი რეალური შენაპირები. ის ოცი შეპირებული ქარხანა, რომელსაც ველით ქუთაისელები ავტოქარხნის ტერიტორიაზე, ვერავითარ დოვლათს ვერ შეგვძენს, თუი მას არ ექნა გასაღების ბაზარი.

გიორგი თევდორაძე: იმ ქალაქში, რომელსაც აქვს რეალური შანსი გახდეს ქვეყნის მეორე დედაქალაქი, ჩემი ოპონენტების გასაგონად მინდა ვთქვა, რომ ყველა მათი დაპირება არის პრაგმატიზმს და რეალობას მოკლებული. ჩვენი წინასაარჩევნო დაპირების უმთავრესი არგუმენტაცია მდგომარეობს იმ ნაკეთებ საქმეებში, რომელიც გვიკეთებია და რომელიც ცოტაა იმასთან, რაც გასაკეთებელია, ზოგადად, ქვეყანაში. "წინ წარსულისკენ" ნაცვლად, ჩვენ ვამბობთ - "წინ მომავლისკენ".

მაია მეცხვარიშვილი

ქუთაისიდან