რა იციან ადგილობრივი თვითმმართველობის არჩევნების შესახებ; წავლენ თუ არა 30 მაისს საარჩევნო უბანში ხმის მისაცემად;, რას ფიქრობენ მომავალ არჩევნებზე და როდის დაიწყო წინასაარჩევნო კონკურენცია ახალქალაქში – ამ საკითხების გარკვევა “სამხრეთის კარიბჭემ” არჩევნებამდე ორი დღით ადრე სცადა.
რა განაცხადეს ამომრჩევლებმა არჩევნებამდე რამდენიმე დღით ადრე
პირველი რესპონდენტი დაახლოებით 30 წლის, ემოციური მამკაცია, გვარად ოვანნისიანი, სახელს არ გვიმხელს, მიუხედავად იმისა, რომ მისივე თქმით, “არაფრის ეშინია”: “რა თქმა უნდა, ვიცი, რა არჩევნებია – ადგილობრივი მუნიციპალიტეტის. დავინტერესდი, იყო თუ არა ჩემი სახელი საარჩევნო სიაში, არჩევნებზეც წავალ. ხმას ვის მივცემ? არავის საქმე არ არის, მე მაქვს უფლება, ეს არავის გავუმხილო”.
მეორე რესპონდენტიც აქტიური ამომრჩეველი აღმოჩნდა.
“რა საკითხავია, არჩევნებზე წავალ და ვიცი, რა არჩევნებიცაა, ჩვენ ყველამ ვიცით, ხმას ვის მივცემთ. გასაგებია, რომ არჩევანი ვადამდეა გაკეთებული”, - გვითხრა ახალქალაქის მცხოვრებმა კარლენ მეცატუნიანმა.
წინა რესპონდენტისგან განსხვავებით, ნინა ვარდანიანმა არჩევნების წინა დღეებშიც კი არ იცის, რა არჩევნებია, როდის და ვის აძლევს ხმას. მან ჩვენი ყურადღება მაშინ მიიქცია, როცა მარცვლეულის ჩამბარებელი პუნქტის ყოფილი შენობის გრძელ კედელზე ჩამწკრივებულ მმართველი პარტიის პლაკატებს ათვალიერებდა.
“ახალქალაქში დასთან ერთად ვცხოვრობ. მე საქართველოს მოქალაქე ვარ, თუმცა, რა არჩევნებია, არ ვიცი. ალბათ, აივაზიანის (ახალქალაქის მუნიციპალიტეტის საკრებულოს თავმჯდომარე) არჩევნებია. მიკვირს, სააკაშვილის ფოტოებიანი პლაკატები ყველგან რატომ არის გაკრული. ვინ არიან კანდიდატები? როდისაა არჩევნები? არჩევნებზე აუცილებლად წავალ. ჯერჯერობით, არ ვიცი, ხმას ვის მივცემ, მაგრამ არჩევნებზე აუცილებლად წავალ, რათა ჩემი ხმა არ დაიკარგოს”, - ამბობს იგი.
ლევონ ლევანიანს სხვა პრობლემა აწუხებს. იგი არჩევნებში მონაწილეობის მიღებას ვერ შეძლებს, რადგან საარჩევნო სიაში არ არის: “არჩევნებზე არ წავალ, რადგან საარჩევნო სიებში ჩემი სახელი და გვარი არ არის. უკვე რამდენიმე წელია, ასეა, ჩემი საარჩევნო უფლების აღდგენის თხოვნით რამდენჯერმე მივმართე, მაგრამ ამაოდ. ვაჟიშვილს 18 წელი ახალხანს შეუსრულდა და ის არის სიაში. ასეთივე მდგომარეობაში ბევრი ადამიანია, ალბათ, მოსახლეობის 10-15 პროცენტი - ეს ჩემი პირადი მოსაზრებაა. ადგილობრივი საარჩევნო კომისია ცუდად მუშაობს”.
რამდენად შესაბამისი იქნება ახალქალაქში არსებული ასეთი წინასაარჩევნო სურათი არჩევნების შედეგებთან, ამას მოგვიანებით ვნახავთ.
წინასაარჩევნო კონკურენცია
ნამდვილი წინასაარჩევნო კონკურენცია ახალქალაქში მხოლოდ “5” (ერთიანი ნაციონალური მოძრაობა) და “7” (ბლოკი – ეროვნული საბჭო) ნომრებს შორისაა.
სააგიტაციო პერიოდის ბოლოს, თავად პარტიების წარმომადგენლებისგან შევეცადეთ გაგვეგო, რა სიტუაცია იყო აგიტაციის თვალსაზრისით და რითი შეიძლებოდა ოპოზიციური პარტიების პასიურობის ახსნა.
ქრისტიან-დემოკრატიული პარტიისა და საქართველოს დემოკრატთა პარტიის წარმომადგენლებმა გვითხრეს, რომ წინასაარჩევნო აგიტაციამ ნორმალურ პირობებში ჩაიარა, ყველაფერი, რაც დაგეგმილი იყო, შესრულდა და ახლა მხოლოდ კენჭისყრის შედეგებს ელიან.
მრეწველთა პარტიის წარმომადგენელს წინასაარჩევნო აგიტაციის პერიოდის დასრულებამდე რამდენიმე საათით ადრე ვესაუბრეთ. წინასაარჩევნო აგიტაციის პირობებით ისიც კმაყოფილია და იმედი აქვს, რომ აგიტაციის დასრულებამდე რამდენიმე დარჩენილ სოფელში ჩასვლასაც მოასწრებს.
აღუნიკ აივაზიანი, ახალქალაქი
Posts
0 Responses to "ახალქალაქი არჩევნების წინ"
Post a Comment